Thursday, 13 Dec 2012 15:42
အဝေးပြေး ကားဝင်းတွေက ငွေကြေးတွေ ကောက်ခံရသမျှတွေဟာ စည်ပင်သာယာ
ဝန်ထမ်းတွေရဲ့ လက်ထဲကမှ နိုင်ငံတော်ရဲ့ အခွန်တော် အနေနဲ့ အသက်ဝင် လာရတာပါ။
တိုက်ရိုက်စာနဲ့ ဆင့်ပြီးမှ သတ်မှတ်ချက်အပြည့် အခွန်တော်ငွေတွေကို
နိုင်ငံတော်အတွက် ရရှိနိုင်ပေမယ့် ဝန်ထမ်းတွေ လက်ထဲကမှ စာရွက်စာတမ်း
မရှိတဲ့ အခွန်တော် ငွေတွေကတော့ ဝန်ထမ်းတွေရဲ့ အိတ်ကပ်ထဲက တဆင့်
ရောက်ကြရတာဆိုတော့ ....။ မြန်မာပြည်က မြို့တိုင်းမှာ အဝေးပြေး ကားဝင်းတွေ
ရှိကြပါတယ်။ ထိုအထဲက မြို့ကြီးများက အဝေးပြေး ကားဝင်းတွေသာ ဝင်ခွင့်
ကောက်ခွင့်ရသလို တစ်နေ့ တစ်နေ့ ကောက်ခံရတဲ့ ငွေကလည်း မနည်းပါဘူး။
မက်လောက်စရာပါ။ ဒါကြောင့်လည်း မြို့ကြီးတွေရဲ့ အဝေးပြေး ကားဝင်းတွေမှာ
တာဝန်ကျတဲ့ စည်ပင် ဝန်ထမ်းတွေဆိုရင် လက်ထဲမှာ ငွေပဒေသပင် သီးနေသလိုပါပဲ။
တစ်ရက်က ကျွဲဆည်ကန် အဝေးပြေး ကားဝင်းလို့ခေါ်တဲ့ ချမ်းမြရွှေပြည် ကားဝင်းမှာ
ကားဝင်းဝင်ခွင့် ကောက်နေတာတွေကို ဆိုင်ကယ်ခဏ ရပ်ပြီးကြည့်ရင်း ဝင်ငွေတွေကို
တွက်နေမိပါတယ်။ ကားဝင်း တောင်ပေါက်က လမ်းပြင်နေတာကြောင့်
ကားဝင်းမြောက်ဘက်မှာ အရှေ့ပေါက်၊ အနောက်ပေါက် စတဲ့ ဝင်ပေါက်နှစ်ပေါက်မှာ
ဝင်ခွင့်တွေပေးပြီး ဝင်နေရတာပါ။ အနောက်ပေါက်က အများဆုံး ဝင်ကြတဲ့
ဝင်ပေါက်ပါ။
စောင့်ကြည့်မိတာက လူဝင်နည်းတဲ့ အရှေ့ပေါက်။ ကားတစ်စီး (၂၀၀) ကျပ်နဲ့
ဆိုင်ကယ်တစ်စီး (၅၀) ကျပ်ကောက်ပါတယ်။ ဆိုင်ကယ်ဆိုရင် ၅၀ တန်မပါရင် ၁၀၀
ကျပ်ပေါ့။ ကြည့်ရင်းနဲ့ ဝင်လာတဲ့ ကားတွေ၊ ဆိုင်ကယ်တွေ အရေအတွက်ကို
မှတ်နေမိတယ်။ ဒါတောင် နေ့ခင်းအဝင်အထွက် နည်းနေတဲ့အချိန်။ တစ်မိနစ်ကို
ဆိုင်ကယ် ၁၀ စီး၊ ကား ၅ စီးနှုန်းလောက် ပျှမ်းမျှဝင်နေတာ တွေ့ရတယ်။
ဒါကြောင့် တစ်မိနစ်ပျှမ်းမျှ ဝင်ကြေးရတဲ့ငွေဟာ ၁၅၀၀ ကျပ်ပေါ့။ ကားဝင်းရဲ့
ဝင်ခွင့်ကောက်နေရတဲ့ အချိန်က တစ်နေ့ ၁၈ နာရီလောက် ရှိတယ်။ တစ်နာရီကို
ဝင်ခွင့်ရမယ်ငွေက ကိုးသောင်း၊ ဆယ့်ရှစ်နာရီဆိုရင် ၁၆၂၀၀၀၀ ရမှာပေါ့။
ဒါတောင် အဝင်နည်းတဲ့ အရှေ့ပေါက် တစ်ပေါက်ထဲတင် တွက်ကြည့်တာ။ ဒါနဲ့
အနောက်ပေါက်ဘက် လှည့်ကြည့်တော့ စည်ပင်ယူနီဖောင်းနဲ့ ဝန်ထမ်းက ဘေးနားက
တဲလေးထဲမှာပါ။ အပြင်မှာ ငွေကောက်နေတဲ့ သူတွေက အပြင်ကနေ အခကြေးငွေပေးပြီး
ခေါ်ထားတာထင်ရဲ့။ မူးနေတဲ့ သူတွေလည်း ပါတယ်။ သူတို့လက်ထဲမှာလည်း ငွေတွေ
တစ်ထပ်ကြီးနဲ့ပါပဲ။ တကယ်တော့ စာရင်းဇယားနဲ့ဝင်တဲ့ ငွေကြေးမဟုတ်တော့
တကယ်တမ်း ဘဏ္ဍာအတွက် တရားဝင် ဘယ်၍ဘယ်မျှ ဝင်သည်တော့ မသိချေ။
ကားဝင်းတာဝန်ကျတဲ့ စည်ပင် ဝန်ထမ်းတွေကတော့ သူ့တို့စီးပွားပမာ
စေတနာအပြည့်နဲ့ တာဝန်ကျေကြတယ်။
ချမ်းမြရွှေပြည် ကားဝင်းကြီး တည်ဆောက်ခဲ့တာ ကြာပေမယ့် ကားဝင်းကြီးကတော့
တည်ဆောက်စ ကာလကတည်းကအတိုင်း တိုးတက်မှု မရှိပါဘူး။ ပြောင်းလဲတာကတော့ အရင်က
ကားဝင်းမှာ ရှင်းနေတယ်။ အခုကားတွေ ကျပ်ပြည့်နေတာကလွဲရင် ကားဝင်းထဲက လမ်းတွေ
ပျက်စီးနေတာကတော့ ပြောင်းလဲလာတဲ့ ရလဒ်လို့ ဆိုရမှာပါပဲ။ ကားဝင်းကြီးရဲ့
ပင်မ အဆောက်အဦကြီးလည်း ဆေးသုတ် ပြုပြင်တယ်ဆိုတာကို မကြားဖူးခဲ့ပါဘူး။
ဖုန်တွေ တစ်ထောင်းထောင်းနဲ့ ကျွဲဆည်ကန် ကားဝင်းက မန္တလေးရဲ့ ပုံရိပ်လို့လည်း
မပြောနိုင်ပါဘူး။ မြန်မာတစ်နိုင်ငံလုံးမှာ ရှိတဲ့ အဝေးပြေး
ကားဝင်းတွေမှာလည်း ဒီအတိုင်း၊ ဒီပုံစံတွေ အတိုင်းပါပဲ။ လမ်းတွေကလည်း
ကြမ်းကြမ်းပါပဲ။ ကားဝင်းကြီးကသာ မတိုးတက်ပေမယ့် မြို့ကြီးတွေက
ကားဝင်းတွေမှာ တာဝန်ကျတဲ့ စည်ပင်ဝန်ထမ်းတွေရဲ့ အိမ်တွေကတော့
ကောင်းနေမလားတော့ မသိ။သူတို့လက်ထဲမှာ ငွေပဒေသာပင် သီးနေတာကတော့ အသေအချာပင်။
ရွှေမောင်
ရွှေမောင်
No comments:
Post a Comment