မမေ့နိုင်သောဒေသ၊
မမေ့နိုင်သောဖြစ်ရပ်၊ နေရာက ရှမ်းအရှေ့တောင်ပေါ်ဒေသ
မိုင်းယု အ.လ.က ကျောင်းလေး၊ တစ်နေ့သော စာသင်ချိန်၏နံနက်ခင်း။ ဟေ့
.......ကလေးတစ်သိုက် ညာသံပေးကာ၊ ကျောင်းဥယျာဉ် သို့ထွက်လာသည်။ ပန်းခြံတွင်
ပျံဝဲနေသည့် လိပ်ပြာကလေးများကို လိုက်ဖမ်းကြ သည်။ ဆရာစိုး
ရုံးခန်းမှထွက်ကာ- "ဟယ် တင့်တင်ပြုံးတို့၊ ရီရီ မြတ်တို့ ကလေးတွေကို မထိန်း
ကြတော့ဘူးလား" ဆရာစိုးအော်သံကြောင့် ဆရာမကလေးနှစ်ဦးက ကလေးများ ကို
ကျောင်းခန်းထဲပြန်ထည့်သည်။သည်ပန်းပေါင်းစုံ ဥယျာဉ်ကလေးကို သည်ကျောင်းလေး နှင့်အတူ ဆရာစိုး တည်ထောင်ခဲ့ရသည်။ ကလေးတွေက လိပ်ပြာဖမ်းရင်း ပန်းပင်တွေနင်းချွေ သွားမှာစိုးရိမ်သည်။ ကလေးတွေက လိရှမ်း၊ အာခါ၊ လားဟူ၊ လွယ်လ၊ ဗမာစသည့် တိုင်းရင်းသားလေးတွေ။ သည်ကျောင်း မှာ ပညာရည်နို့သောက်စို့ သလို လိပ်ပြာလေးတွေလည်း ပန်းပွင့် တွေမှာနားပါစေ၊ ဒါက သဘာဝ အလှတရား၊ ဒါအဖြင့် အကျိုး တရားက ကျောင်းဘေးမှာရှိတဲ့ သူတို့မိဘတွေရဲ့ နှမ်းခင်းတွေကို လိပ်ပြာလေးတွေက ဝတ်မှုန်ကူး ပေးဦးမယ်လေ။ ဆရာစိုးက ကလေးတွေကိုချစ်သလို ဥယျာဉ် ရဲ့အလှကို ဖြည့်ဆည်းပေးသည့် လိပ်ပြာလေးတွေကိုလည်း ချစ် ပါသည်။
----------------
"အိပေါ့ကျန်"
"ဗျာ ဆရာလုံ"
"ဟိုပန်းခြံထဲမှာ လိပ်ပြာ လိုက်ဖမ်းနေတဲ့ကလေးထွားထွား ကြီးကိုခေါ်ပေးပါ"
အိပေါ့ကျန်သည် သောက်ရေအိုးစင်များကို ရေဖြည့်နေရာ မှ ပန်းခြံထဲတွင် လိပ်ပြာဖမ်းနေသော ကလေးထွားထွားကြီးကို လက်ဆွဲ၍ ရုံးခန်းသို့ခေါ်လာ သည်။ သည်ကလေးတွေ 'လိပ် ပြာမဖမ်းရ'ဟုတားမြစ်ထားပါ လျက်.........
ဆရာစိုးသည် ရုံးခန်းထောင့်က ကြိမ်လုံးကိုလှမ်းယူပြီး လက်တွင်ချိန်ဆနေမိသည်။ သည်အချိန်တွင် ကလေးကြီးက ဆရာစိုးရှေ့တွင် ငူငူကြီး ရပ်နေ သည်။ မျက်နှာက ငိုမဲမဲ့။
"လုကျိုင်း မင်းနာမည် ဘယ်လိုခေါ်လဲ''
"အိုက်စိုင်း''
"ဘယ်သူ့အတန်းကလဲ"
"ဆရာမ အီရွန်ရွက်"ဟု ဆိုကာ၊ အသံကဆက်မထွက်၊ မကြာမီ ဆရာမလေးအီရှန်ရွက် ရောက်လာသည်။
"သမီး သည်အိုက်စိုင်းက ညည်းအတန်းကဆိုပဲ။ သည် ကလေးက ဘာပြုလို့လိပ်ပြာ တွေလိုက်ဖမ်းနေရတာလဲ၊ ဒါ ကျောင်းချိန်လေ၊ ညည်းမဆုံးမ ဘူးလား"
"ဆုံးမပါတယ်ဆရာလုံ၊ ဒါ ပေမယ့် သည်ဒေသမှာက လိပ်ပြာတွေ့ အဖိုးတန်တယ်လေ"
"ရှင်းအောင်ပြောစမ်းပါဦး"
"သည်လို ဆရာလုံရဲ့ လိပ်ပြာတွေဖမ်းလို့ရရင် ရွာအရှေ့ကမ်းနားက အီမယ့်ဘိုးလာထံကို သွားရောင်းလို့ရတယ်။ အကောင်သေးရင် တရုတ်ငွေနှစ်ယွမ်၊ အကောင်ကြီးရင် သုံးယွမ်ရတယ်။ သုံးယွမ်ဆိုရင် ဆန်ပြီဝက်ရပြီ ဆရာလုံရဲ့"
"ဒါနဲ့ နေပါဦး၊ အိမယ်ဘိုးလာက သည်လိပ်ပြာတွေကို ဝယ်ပြီးဘာလုပ်သလဲ"
"သည်လိပ်ပြာတွေရဲ့ဝမ်းဗိုက်ကို ဆေးထိုးပြီးမပုတ်အောင် လုပ်တယ်။ ပြီးတော့ စုပြီးတရုတ်ပြည်ဘက်ကို သွားရောင်းတယ်။ သည်ဆေးရည်ထိုးထားတဲ့ လိပ်ပြာတွေကို တရုတ်တွေက ပရိဘောဂအလှဆင်ရာမှာ သုံးတယ်လို့ သမီးသိရတယ်"
ဆရာစိုးသဘောပေါက်လေပြီ။ "သည်ကလေးရဲ့ အခြေအနေကရောကွယ့်"
"သည်အိုက်စိုင်းကလေး အဖေက မနှစ်ကလယ်လုပ်ရင်း ပိုးထိတယ်။ ယခုလိုဆေးရုံတွေ ဘာတွေမရှိတော့ ဆုံးသွားတာပေါ့။ သူ့အမေ မုဆိုးမနဲ့အတူ၊ ညီမလေးနှစ်ယောက်နဲ့ ရွာအနောက်ပိုင်းမှာနေတယ်လေ"
ဆရာစိုး အိုက်စိုင်းမျက်နှာကို ကြည့်လိုက်သည်။ အိုက်စိုင်း မျက်လုံးအိမ်မှ မျက်ရည်ပေါက်ကြီးများ သူ့ပါးပြင်ပေါ်သို့ ကျဆင်းလာသည်။ ဆရာစိုးလက် ထဲမှ ကြိမ်လုံးက မည်သို့လွတ်ကျသွားသည်မသိ။ သည်နောက် ဆရာစိုးက အိုက်စိုင်းကိုသိမ်မွေ့ ညင်သာစွာ ပွေ့ဖက်ထားလိုက်မိသည်။
"ဆရာလုံ သားကိုမရိုက် တော့ပါဘူးကွယ်"
ဆရာလုံ=ဆရာကြီး
အိပေါ့=အဖေ
အိမယ်=အမေ
လုကျိုင်း=သား
သန်းစိုးအောင်
- 19 October 2012 |
- By SHADE Journal
No comments:
Post a Comment